شۆڕشی فیئودال-عەشیرەیی مەلا مستەفا بارزانی دژی چاکسازی زەوی لە ئاوێنەی بیرەوەرییەکانی چالاکوانانی سیاسی‌دا
شۆڕشی فیئودال-عەشیرەیی مەلا مستەفا بارزانی دژی چاکسازی زەوی لە ئاوێنەی بیرەوەرییەکانی چالاکوانانی سیاسی‌دا
https://drive.google.com/file/d/1S7841ngLzhwreI0ClxKBMr7lR-24abeG/view?usp=sharing
بەپێچەوانەی باوەڕی باو، شۆڕشی مەلا
مستەفا بارزانی نەک بزوتنەوەیەکی ڕزگاریخوازی نەتەوەیی، بەڵکو لە سەرەتادا
ڕاپەڕینێک بوو لە دژی چاکسازی زەوی عەبدولکەریم قاسم لە ساڵی ١٩٦١دا.
بیرەوەریی چالاکوانە سیاسییەکان و
شاهیدە چاوپێکەوتووەکانی ڕووداوەکان، لە سەرچاوە گرنگەکانی مێژوونووسی دان. لە
خوارەوە، پێنج نموونە لە بیرەوەریی کەسایەتییە چالاکەکانی ئەو سەردەمە دەخەینەڕوو.
١- مەلا ڕەسوول پێشنماز:
دوای هاتنەسەرکاری زەعیم عەبدوڵکەریم
قاسم و گەڕانەوەی بارزانی نەمر دوای نزیک بە دوازە ساڵ و پێش هەڵگیرسانی شۆڕشی
ئەیلوول، بەهۆی دەسەڵات و پشتگیریی حیزبی شیوعی عێراقی لە وەرزێرەکان، تاقمی
ئاغاکان زۆریان تێن بۆ هات. کار گەیشتە ئەوەی کە موڵکەکانیان بە گۆریسی لە
نێو وەزیرەکاندا دابەش بکەن، بەتایبەتی لە دەڤەری پشدەر و ڕانیە و قەزای
دووکان و بیتوێن‌دا. چەند کەس لە میراوڵێیەکان و شێخ حوسێنی بۆسکین و
کاک هەباسی مامەند ئاغای سەرکەپکان و مام کویخا سمایلی تەڵان بڕیار دەدەن بچنە
بەغدا بۆ لای عەبدوڵکەریم قاسم بۆ ئەوەی ڕێگەچارەیەک بدۆزنەوە.
کاتێک دەچنە بەغدا، چەند جار داوای
بینینی عەبدوڵکەریم قاسم دەکەن کە ڕێگایان پێنادات. پاشان هەباس ئاغا،
کە دۆستایەتییەکی لەمێژینەی لەگەڵ بارزانی هەبوو، پێشنیار دەکات سەردانی بارزانی
بکەن. کاتێک بارزانی ڕێگایان پێدەدات، بە هەموویان داوا لە بارزانی دەکەن چیتر
ئاوا دانەنیشێت و بۆ هەقی کورد وەشاخ کەوێت. بارزانی لە وەڵامیاندا دەڵێت:
«ئەو پیاوە دوای ئەو هەموو ساڵە منی هێناوەتەوە و دەبێتە بێ‌وەفایی من لە دژی
بووەستمەوە. لە لایەکی دیکەشەوە کورد پیاوی مەیدانی کەمە و پاشان بەشی زۆرتان لەو
قسانەی ئێستاتان پاشگەز دەبنەوە.» هەرچی بارزانی ئینکار دەکات، ئەوان واز ناهێنن.
لە دوا جار بارزانی دەڵێت: «ئەگەر هەر واز ناهێنن، دەبێ هەمووتان سوێندم بۆ بخۆن
کە لە دواڕۆژدا پشتم بەرنادەن.» قورئان لەسەر تاقە دەبێت، بۆیان دێننە خوارێ و لە هەباس
ئاغا و شێخ حوسێن و میراوڵێیەکانەوە دەست دەکەن بە سوێندخواردن، کە بەخۆیان و
بە هێزە چەکدارەکانیانەوە دەخزمەتی بارزانی و شۆڕش دا دەبن.[1]
٢- جەلال تاڵەبانی لە کتێبی «دیداری
تەمەن»دا:
«سەرۆک عەشیرەکانی کورد — هەموو ئەوانەی
زیانیان لە چاکسازیی زەوی دیتبوو — دەهاتنە لای مەلا مستەفا و سکاڵایان دەکرد.
بەداخەوە مەلا گرنگیی زۆری بە سەرۆک عەشیرە، ئاغا و شێخەکان دەدا.
لە بیرمە کاتێک سەرۆکە عەشیرەکان
کۆببوونەوە — لە شێخ تەحسینی ئیزەدییەوە هەتا شێخ و ئاغاکانی خۆشناوتی، دزەیی،
پشدەر و کەسانی دیکە — هەموویان پەنایان بردە بەر مەلا و دەیانگوت: «تۆ
گەورەمانیت و پشتیوانیمان بکە.» مەلا ئەمانەی لە دەوری خۆی کۆکردەوە و بەرگرییان
لێکرد.
ئاغاکان هەیئەتێکیان ناردە بەغدا بۆ
بینینی قاسم، لە کاتێکدا قاسم لەژێر فشاری کۆمپانیا نەوتییە ڕۆژئاواییەکاندا بوو
بۆ نەتەوەیی‌کردنی نەوت.
لە ڕاستیدا ئەم ئاغایانە لە دژی
چاکسازیی زەوی ڕاپەڕیبوون. زۆرینەی جەماعەتی دەفتەری سیاسیی پارتی لەگەڵ چاکسازیدا
بوو، بەڵام مەلا مستەفا دوژمنی یاسای چاکسازیی زەوی بوو و پشتیوانیی گەورەکانی
دەکرد. مەلا چاکسازیی کشتوکاڵی بە پێچەوانەی شەرع دەزانی.»[2]
«ماوەیەک پێش دەستپێکردنی ڕاپەڕینی ئەیلوولی
١٩٦١، زۆرێک لە عەشیرەکان و خاوەن زەوییە کوردەکان بە هاندانی مەلا مستەفا
لە دژی دەوڵەتی چاکسازیخواز یاخی بوون. پێشەنگانی ڕاپەڕینی دژی چاکسازیی زەوی
بریتی بوون لە حاجی قادر ئیسماعیل عوزێری، حاجی ئیبراهیم چەرمەگا، شێخ تەیفووری
سەرگەڵو، کویخا ئیسماعیل تەلان، شێخ مەحمودی کاریزە و سەرۆکە عەشیرەکانی جاف،
سورداش، بازیان، هەمەوەند، شارباژێر، خۆشناوتی و سەفین.»[3]
٣- عیسا پێژمان لە کتێبی «تووندبای
ڕووداوەکان»دا:
ئێران و بەریتانیا لە ساڵی ١٩٦١دا لە
ڕێگەی سەفارەتخانەکانیانەوە لە بەغدا، پەیوەندییان لەگەڵ مەلا مستەفادا دروست کرد
و ئەویان بۆ ڕابەرایەتیی ڕاپەڕینی سەرۆکە عەشیرەکان و ئاغا ناڕازییەکان لە
چاکسازیی قاسم، بۆ ناوچەی بارزان نارد. ئەوان بەڵێنی پشتیوانییان بە مەلا دا.[4]
٤- عەبدوڵڵا حەسەن‌زادە و دکتۆر عەبدولڕەحمان
قاسملو لە کتێبی «خیانەتەکانی قیادەی موەقەت بە نەتەوەی کورد»دا:
«لە ساڵی ١٩٦١ هەندێک لە دەرەبەگەکانی
کوردستانی عێراق کە لە بەرنامەی چاکسازیی زەوی ڕژێمی عەبدولکەریم قاسم ناڕازی بوون
دەستیان دایە چەک و چوونە شاخ. پاش ماوەیەک پارتی دیموکراتی کوردستان سەرۆکایەتیی
بزووتنەوە چەکدارییەکەی گرتە دەستی خۆی و دروشمی نەتەوایەتیی خۆموختاری بۆ
کوردستان هەڵگرت. لەو مێژووەوە، واتە لە سپتەمبەری ١٩٦١ەوە، بزووتنەوەکە شێوەیەکی
نەتەوایەتی بەخۆیەوە گرت و بەرەبەرە چین و توێژەکانی گەلی کورد لە کوردستانی عێراق
لە دەوری خۆی کۆکردەوە.»[5]
٥- حازم عەلی کوتک لە کتێبی «٥٧ ساڵ خواڵنەوە
لە ژێر وەهمی شۆڕشدا»:
«وڵاتانی دراوسێ لەوانە سعودیە، ئوردن و
ئێران، بە ڕابەرایەتیی بەریتانیا کە خۆی وەک پارێزەری نیزامی فیئودالی
دەزانی، هەوڵیان دا بۆ ڕاپەڕین لە دژی قاسم.
ئاغاکانی کوردستان دوای چەند مانگ لە
دەستپێکردنی ڕاپەڕین توانییان لە شارەزایی سەربازیی مەلا مستەفا بارزانی سوود
وەربگرن. مەلا مستەفا ڕازی بوو ڕابەرایەتییان بگرێتە دەست.
شای ئێران بە ئاماژەی بەریتانیا، ئەمریکا و
ئیمپریالیزمی جیهانی، پشتیوانیی ئەم بزوتنەوە چەکدارییەی کرد؛ بزوتنەوەیەک کە لە
سەرەتاوە لە دژی چاکسازیی زەوی پێکهاتبوو.»[6]
ستراتیژیی بنەماڵەی
بارزانی
«هاوکاری لەگەڵ دەوڵەتانی داگیرکەری کوردستان
بۆ سەرکوتکردنی ئازادیخوازانی هەر چوار پارچەی کوردستان، بە مەبەستی بەدەستهێنانی
پشتیوانی و یارمەتیی دارایی، سەربازی و سیاسی بۆ فەرمانڕەوایی و ئاغایەتی بەسەر
بەشێک لە کوردستانی عێراقدا»
ئەمە ستراتیژیی نەگۆڕی بنەماڵەی
بارزانیە کە پێشینەیەکی هەزار ساڵەی هەیە لە کوردستان. لە هەزارساڵەی ڕابردوودا،
میرنشینەکان، سەرۆک عەشیرەکان، شێخەکان و فیئودالەکان بەم ستراتیژییە سەروەریی
خۆیان بەسەر گەلی کوردستاندا سەپاندووە.
لە سەدەکانی ڕابردوودا، ستراتیژیی
هاوژیانی سەرانی عەشایر و فیئودالەکانی کورد لەگەڵ دەوڵەتە زاڵەکاندا (سەفەوی،
عوسمانی و...) بەم شێوەیە بوو: خاندانی فەرمانڕەوای ناوخۆیی، سەرۆک عەشیرەکان و
میرەکانی کورد، لە ڕۆڵی نوێنەر و خزمەتکاری دەوڵەتدا، داهاتی سنووری خۆیان لەگەڵ
ناوەنددا دابەش دەکرد، دژبەرانی دەوڵەتیان سەرکوت دەکرد و لە کاتی جەنگی ناوخۆیی
یان دەرەکیدا، جەنگاوەرانی خۆیان دەخستنە خزمەت دەوڵەتەوە.
تیۆری مەلا مستەفای نەخوێندەوار کۆپیەک
بوو لەم ستراتیژییەی فەرمانڕەوا ناوخۆییەکان و سەرۆک عەشیرەکانی ڕابردوو کە دوای
خۆی لەلایەن کوڕەکان و نەوەکانییەوە بە سەرکەوتوویی جێبەجێ کراوە و ئێستاش دەکرێت...
لەم سیستەمەدا، هاوژیانێکی دوولایەنە
هەیە کە هەردووکیان سوودی لێ وەردەگرن — تەواو وەک هاوژیانی قەلەڕەش و گورگ.
لە سروشتدا، هاوپەیمانیێکی هەزاران
ساڵە لە نێوان دوو زیندەوەری بە ڕواڵەت جیاوازدا هەیە: قەلەڕەش (لاوازلەش، بێ‌بەزەیی
و فێڵباز) و گورگ (ڕاوچییەکی بەهێز و ئازا). ئەم هاوژیانە لەسەر بنەمای
بەرژەوەندیی دوولایەنەیە. قەلەڕەشەکان بە فڕین لە سەر ئاسمانی زەویدا، ڕاو
دەدۆزنەوە و گورگەکان بەرەو نێچیر ڕێنمایی دەکەن. دوای ڕاوکردن لەلایەن
گورگەکانەوە، قەلەڕەشەکان بەشێک لە پاشماوەی لاشەکە دەخۆن.
بۆ قەلەڕەشەکان، هاوکاری لەگەڵ گورگدا،
گەیشتنە سەرچاوەی خۆراکە. بۆ گورگەکانیش، دیدەبانی ئاسمانیی قەلەڕەشەکان و
توانایان لە دروستکردنی سەرلێشێواوی و گومڕاکردنی نێچیر، ڕاوکردن کەم‌مەترسیتر و
ئاسانتر دەکات.
هەندێک جار قەلەڕەشەکان لاشەی ئاژەڵێکی
گەورە دەدۆزنەوە، بەڵام ناتوانن پێستە ئەستوورەکەی بدڕن؛ بۆیە گورگەکان ڕێنمایی
دەکەن. گورگەکان لاشەکە دەدڕن و قەلەڕەشەکانیش بەشی خۆیان دەخۆن.
بەپێی «ستراتیژیی قەلەڕەش و گورگ»
بنەماڵەی بارزانی دەوڵەتانی ناوچە — تورکیا، عێراق و ئێران (چ لە سەردەمی
پەهلەویدا و چ لە کۆماری ئیسلامیدا) — وەک هێزی پشتیوان دەبینێت کە هاوژیانی
لەگەڵیاندا دەتوانێت زاڵبوونی ئابووری و سیاسی و سەربازیی ئەم خاندانە بەسەر بەشێک
لە کوردستاندا بسەپێنێت.
قەلەڕەشەکان نێچیرەکانیان لە نێو
هاوجۆرەکانی خۆیان هەڵناژمێرن؛ بەڵام بنەماڵەی بارزانی نێچیرەکانیان خۆیان هەمیشە
لە نێو کوردانی هەر چوار پارچەی کوردستانەوە هەڵبژاردووە.
ئەم سیاسەتە؛ لانیکەم لە حەوت قۆناغی
جیاجیای مێژووییدا، لەگەڵ چوار هێزی جیاوازی هەرێمیدا، بە شێوەیەکی بەڵگەیی
دووبارە بووەتەوە و ئێستاش بە هاوژیانی لەگەڵ تورکیادا درێژەی هەیە:
١- لە ساڵی ١٩٦١دا، مەلا مستەفا بارزانی
ڕابەرایەتیی ڕاپەڕینی فیئودالەکان و سەرۆکە عەشیرەکانی لە دژی چاکسازیی زەوی
عەبدولکەریم قاسمی بە پشتیوانیی ئەمریکا، ئێران و بەریتانیا گرتە دەست. لە ئاکام
دا قاسم کە لە کوردستان مەشغوڵی شەڕی مەلا مستەفا بوو، ئاگای لە پیلانەکانی ناو
بەغدا نەما، ساڵی 1963 خۆی و چاکسازیەکانی بوونە قوربانی کودتای عەڕەبی قەومی و
بەعسیەکان. بەم کودتایە پشتی هەژاران، جوتیاران و ئازادیخوازانی کورد و عەرەب شکا
و تا ئێستاش ئەم پشتانە ڕاست نەبوونەوە.
٢- لە ساڵی ١٩٦٧دا، مەلا مستەفا بارزانی
فەرمانی دا هێزەکانی چالاکوانانی حیزبی دیموکراتی کوردستانی ئێران کە لە کوردستانی
عێراق پەنابەر ببوون بکوژن یان بیاندەنەوە ساواکی ئێران؛ ئەنجامەکە، کوژرانی زیاتر
لە چل ئەندامی ئەم حیزبە و ڕادەستکردنی تەرمی بەشێکیان بە دەسەڵاتدارانی دەوڵەتی
شا بوو[7].
ناوی بە شێک لە قوربانیەکان: سەدیق ئەنجیری،
سلێمان مەعینی، خەلیل شوباش، قادر شەریف، کاوە مەرغانى، دڵشاد ڕەسوولی، مەلا ڕەحیم
وێردی، ئەسعەد خودایاری، هەروەها دەستگیرکردن و ڕادەستکردنی گرووپی ٩ کەسیی ساڵح
لاجانی بۆ ئێران لە ساڵی ١٩٦٨، کە هەموویان لە پادگانی جڵدیانی پیرانشار ئێعدام
کران.
٣- لە ساڵی ١٩٧١دا، دەسگای پاراستنی مەلا
مستەفا یەکێک لە دوو ڕابەری پارتی دیموکراتی کوردستانی تورکیا بەناوی «سەعید ئالچی»
لە دێی قومری نزیک سنوری تورکیا تیرۆر کرد و پاشان تاوانەکەیان خستە ملی ڕابەرەکەی
دیکەی ئەم پارتە بەناوی «دکتۆر شوان» و سێ هاوڕێیەکەی. ئەم شۆڕشگیرانە بەم تاوانە
نەکراوە لەلایەن بارزانییەکانەوە تیرباران کران؛ بەم شێوەیە مەلا مستەفا توانی
ڕەزامەندیی تورکیا بۆ لای خۆی ڕابکێشێت[8].
٤- لە یەکەم ساڵانی کۆماری ئیسلامیدا
(بەتایبەت ١٩٧٩-١٩٨٣)، پێشمەرگەکانی پارتی دیموکراتی کوردستانی عێراق، لەژێر
سەرکردایەتیی کوڕەکانی مەلا مستەفادا (مەسعود و ئیدریس)، یارمەتیی کۆماری ئیسلامیی
ئێرانیان دا بۆ پاکسازیی کوردستانی ئێران لە حیزبی دیموکراتی کوردستانی ئێران و
کۆمەڵەی شۆڕشگێڕی کوردستانی ئێران[9]؛ لەم پاکسازیانەدا،
بەگوتەی نۆشیروان مستەفا، ٦٠٠ کەسیان لێ کوژرا[10].
٥- لە ساڵی ١٩٩٦دا، مەسعود بارزانی بە فەرمی
داوای یارمەتیی لە جەیشی عێراق لەژێر فەرمانی سەدام حوسێن کرد بۆ دەرکردنی یەکێتیی
نیشتمانیی کوردستان لە هەولێر و شارە گەورەکانی هەرێمی کوردستان؛ بە یارمەتیی
هێزەکانی عێراق، پارتی دیموکراتی ئەم ئامانجەی بەدیهێنا[11].
٦- لە ساڵی ١٩٩٧دا، پارتی دیموکراتی کوردستانی عێراق بە سەرکردایەتیی مەسعود بارزانی، لە دوو عەمەلیاتی هاوبەش لەگەڵ تورکیادا («چەکوش» و «بەرەبەیان») لە دژی پارتی کرێکارانی کوردستان (پەکەکە) بەشدار بوو؛ ئەم ململانێیانە بوونە هۆی کوژرانی لانیکەم دووسەد کەس لە هێزەکانی پارتی دیموکرات و هەزار کەس لە هێزەکانی پەکەکە[12].هاوکات لەگەڵ ئەم ئۆپەراسیۆنە، لە ڕێکەوتی ١٦ی ئایاری ١٩٩٧ (٢٦ی ڕەشەمەی ١٣٧٦)، هێزەکانی حیزبی دیموکراتی کوردستان (پ.د.ک) بە هێرشکردنە سەر ناوەندێکی پزیشکی هێلالی سووری و چەند شوێنێکی دیکە، دەستیان دایە کۆمەڵکوژیی ٨٠ کەس لە ڕۆژنامەنووسان، کادرە پزیشکییەکان و گریلایە بریندارەکانی حیزبی کرێکارانی کوردستان (پ.ک.ک)
7- لە ساڵی 2012 کە شۆڕشی ڕۆژئاوا
دەستی پێکردوە تا ئێستا بنەماڵەی بارزانی هاوکاری تورکیا و هێزە ئیسلامی و عەشایرە
عەڕەبەکانیان کردوە بۆ شکستی ئەم شۆڕشە. لە داخستنی پردی«سێمالکا» تەنیا دەروازەی
سنوری نێوان باشور و رۆژئاوای کوردستان، تا لێدانی خەندەک و دروست کردنی هێزی
بەکرێگیراوی پێشمەرگەی ڕۆژ و...
حەوت نمونەی هاوژیانی داگیرکەرانی
کوردستان، بەرامبەر پێنج هێزی جیاواز لە چوار پارچەی کوردستان و لە ماوەی زیاتر لە
شەست ساڵدا —نیشانەی ستراتیژییەکی پێشبینیکراو و بەردەوامی بنەماڵەی بارزانیە. ئەم
بەردەوامییە نیشان دەدات کە ئەم هاوکارییانە نەک تاکتیکی و کاتی، بەڵکو
ستراتیژییەکی بەردەوامن بۆ بەدەستهێنانی پشتیوانیی دارایی، سەربازی و سیاسی بە
مەبەستی ئاغایەتی و پاشایەتی بەسەر بەشێک لە کوردستاندا.
[1] خەرمانێک لە کۆی
یادەوەریەکانی سەنگەری کودایەتیم. لاپەڕەی 101-102 چاژی 2723 / بیری پاژیک.
[2]دیداری تەمەن — جلال تاڵەبانی — جلدی یەکەم —
لاپەڕە ١٥٨.
[3]دیداری تەمەن — جلال تاڵەبانی — جلدی یەکەم —
لاپەڕە ١٧٦.
[4]کتێبی تەندبادی ڕووداوەکان؛ گفتوگۆ لەگەڵ سەرهەنگی
ستادی «عیسا پەژمان»، نوێنەری شا و بەرپرسی ساواک لە کوردستانی عێراق (لاپەڕە ١٦٠ی
کتێبی دیداری تەمەن — جلال تاڵەبانی).
[5]کتێبی «خیانەتەکانی قیادەی مووقەت بە نەتەوەی
کورد»: عەبدوڵڵا حەسەن‌زادە و دکتۆر قاسملو، لاپەڕە ٧، بڵاوکراوەی کۆمیتەی
ناوەندیی حیزبی دیموکراتی کوردستانی ئێران، ١٣٦٠/٦/٢٥ — ١٩٨١/٩/١٦.
[6]حازم عەلی کوتک، «٥٧ ساڵ خواڵنەوە لە ژێر وەهمی
شۆڕشدا»، یادداشت و بیرەوەری، چاپی یەکەم، ٢٠٢٠، نوسخەی پی‌دی‌ئێف، لاپەڕە ٣٥.
[7]«١٩٦٧
Kurdish Revolt in Iran»؛ بە ئاماژە بە توێژینەوەکانی Ervand Abrahamian و Svante
Cornell سەبارەت بە سەرکوتکردنی ڕاپەڕینی پارتی دیموکراتی کوردستانی ئێران بە
هاوکاریی مەلا مستەفا بارزانی.
«سیاسەتی کوردەکان لە
ڕۆژهەڵاتی ناوەڕاست» نووسینی دکتۆر ئینتیسار، وەرگێڕانەکانی ئیبراهیم یونسی، و
کتێبی مایکل گانتەر. https://diarunadiar.org/news/785
[9]ڕاپۆرتێکی سەربەخۆ سەبارەت بە هاوکاریی سەربازیی
پارتی دیموکراتی کوردستانی عێراق لەگەڵ ئارتێشی کۆماری ئیسلامیدا لە ساڵانی
١٩٨٢-١٩٨٣. «The Kurds Between Iran and Iraq», Middle East Report (MERIP), 1986.
[10]نۆشیروان مستەفا؛ ژمارەی تەلەفاتی پارتی دیموکراتی
کوردستانی عێراق لە هاوکاریی سەربازی لەگەڵ ئارتێشی کۆماری ئیسلامیدا لە دژی پارتی
دیموکراتی کوردستانی ئێران (١٩٧٩-١٩٨٣).
[11]بەڵگەنامەی داواکاریی یارمەتیی مەسعود بارزانی لە
ئارتێشی عێراق لەژێر فەرمانی سەدام حوسێن لە ٣١ی ئاگۆستی ١٩٩٦ لە دژی یەکێتیی
نیشتمانیی کوردستان، و دەرکردنی هێزەکانی ئەم یەکێتییە لە شارە گەورەکانی هەرێمی
کوردستان بە یارمەتیی ئارتێشی عێراق.
[12]بەڵگەنامەی عەمەلیاتەکانی «چەکوش» (Hammer) و
«بەرەبەیان» (Dawn)، ١٩٩٧؛ و ڕاپۆرتی هاوکاتی ڕۆژنامەی The Washington Post (١٦ی
مەیی ١٩٩٧) سەبارەت بە عەمەلیاتە هاوبەشەکانی تورکیا و پارتی دیموکراتی کوردستانی
عێراق لە دژی پارتی کرێکارانی کوردستان.
13- . https://farsi.anf-news.com/54235
نظرات
ارسال یک نظر